Diwylliant hip-hop yw un o’r arfau mwyaf pwerus i helpu i ddod â phobl at ei gilydd mewn ffordd gynhwysol a heddychlon. Mae’n hyrwyddo undod drwy waith tîm ar yr un pryd â dathlu unigolrwydd. Cymerodd hip-hop ei ddylanwadau o gynifer o lefydd. Rydym yn edrych ymlaen at archwilio ymhellach sut gall Cymru ddatblygu ei hunaniaeth hip-hop, gan ddathlu’r hyn y mae Cymru eisoes wedi’i gyflawni.

Mae hip-hop yn hyrwyddo gwybodaeth am eich hunan a’r hyder i wybod eich bod chi wir yn gallu cyflawni’r hyn rydych chi wedi bwriadu ei wneud. Mae yr un mor bwysig ei fod yn ymwneud â chael hwyl a mwynhau’r arddulliau celfyddydol, y cystadlaethau a chanfod beth rydych chi’n ei hoffi amdano.

Mae hip-hop yn darparu llwyfannau sy’n dyrchafu pawb.

Mae Avant yn cynnal digwyddiadau hip-hop, ac rydym yn datblygu Theatr Hip-Hop yng Nghymru i deithio’n genedlaethol ac yn rhyngwladol. Rydym ni wedi canfod mai hip-hop oedd y gelfyddyd a wnaeth ein helpu ni fel unigolion i ganfod ein lleisiau. Rydym ni’n creu Theatr Hip-Hop i roi cyfle i’r straeon amrywiol sydd heb gael eu clywed, i gael eu clywed, ac i sicrhau bod talentau pawb yn cael eu gwireddu. #HipHopIsHere

Cafwyd llawer o ddadlau dros y blynyddoedd ynghylch a yw brêc-ddawnsio yn gamp, yn gelfyddyd neu’n weithgaredd cymunedol. Mewn gwirionedd, mae’r tri pheth yn wir. Mae’r gwaith theatr yn dangos ochr artistig y ddisgyblaeth, mae’r agwedd gorfforol yn gwthio’r corff i’r eithaf ac mae’r dechneg yn caniatáu i brêc-ddawnsio gael ei gynnwys mewn cystadlaethau fel y Gemau Olympaidd.

Rydym ni’n datblygu sesiynau jamio ar gyfer haf 2023; brwydrau 1:1 (a fydd yn cyfrannu at gynghrair www.ukbreakin.org), dawns, bît-bocsio, rapio a graffiti. Bydd rhagor o wybodaeth ar gael cyn hir, cadwch lygad ar ein cyfryngau cymdeithasol i gael rhagor o wybodaeth.

Yn 2022 cawsom ein henwebu am wobr One Dance UK yn y categori gwyrdd, gan ddathlu llwyddiannau’r digwyddiad, Hydro Jam, oedd yn ystyriol o’r hinsawdd. Hydro Jam oedd y digwyddiad jamio gwyrdd cyntaf yn y byd. Adeiladwyd y llwyfan gan ddefnyddio coed o’r coetiroedd a’u disodlwyd, a chafodd offer y DJs a’r microffonau eu pweru gan ynni trydan dŵr.